Po una farrancada de lìbburus, “certàmina” intramesu de is primus e segundas crassis de s’Institudu Tènnigu po Arrexoneris “Primu Levi” de Pitz’e Serra a Cuartu; Mércuris 16 Arbili a is 11,15 oras, atòbiu cun s’autori etotu in s’àula manna de sa scola.

Arrumanzu “grogu” e pruscurturalli chi si contat de sa sotziedadi de oi in diri a Roma, ma podit èssiri fintzas in d-unu logu calisisiat de su mundu, fendi de s’artziadori e de is bividoris de unu cundumìniu, e de s’arrelativismu de is parris insoru, sa medàfera de sa vida.

Pàginis 70, 78, 86.

Su de tres arrùlliu

Martis 24 friaxu, oras 22,39.
Custu mengianu Iqbal mi at pregontau chi cannosciat sa difarèntzia me in su tolleranti e s’arratzista. Dh’apu arrespustu ca s’arratzista est contras a is àterus ca no dhus creit a su paris de issu etotu, intamis su tolleranti tratat is àterus cun arrespetu. A cussu puntu si est acostiau a mei, po no si fai intendi de nemus che fessit po scoviai unu serchetu, e m’at nau a sa scusi: “S’arratzista no arrit mai!”.
Apu pentzau totu sa diri a s’arratzista chi arrefudat de arriri e mi ndi seu acatau ca Iqbal at fatu una scuberta de importu mannu meda. Sa chistioni de s’arratzista no est cun is àterus ma cun issu etotu. Emu a nai de prus: no arrit a is àterus ca no scit arriri a issu etotu. Est berus su dìciu aràbu chi narat: “Chini no tenit no donat”.
….
….
Sa beridadi de Lisabeda Fabiani

Nci funti fintzas medas suspetus apitzus de Marina, sa nura de Beneita, chi no dh’acabbat mai de arripìtiri dònnia borta ca bièt Balentinu: “Ses una prenda! Ses una prenda”. Dhu scint totus ca Marina est sarda, e sa Sardìnnia est numenada po is bardanas. S’amentais totu sa chistioni de Fabrìtziu De Andrè e de s’imprendidori Pepi Soffiantini? No bat duda peruna ca anti cambiau sa strategia issoru lassendi is òminis e pighendi is canis, ca anti cumprèndiu cantu sa genti nci tenint, oi indiri, a is canis. “Seu abetendi sa telefunada de is bardaneris po pagai s’arriscatu. No apu a tzerriai sa politzia po imoi po no ponni in perìgulu sa vida de Balentinu. Seu pronta a spendi totu su dinai chi tengu po pòrriri torrai a tènniri Balentinu. Seu assola chentza de Balentinu, no potzu bìviri chentza de issu.
Mi nd’anti sculau unu bisu mannu meda. Bolemu ca Balentinu iat pòtziu èssiri unu atori numenau che su cumissàriu rex, ca sighit is arrastus de is bandius e dhus arrestat…”.
…..
…..
Mèrcunis 27 austu, oras 22,49.
Custu mengianu apu atobiau Lisabeda. Fiat trista meda. At nau ca sperat sèmpiri ca torrit Balentinu e ca issa tenit provas seguras ca in sa bardana de su pitichedhu nci funti in mesu is bandius sardus. No nc’est duda peruna ca su callelledhu apat prenu sa vida cosa sua apustis de sa morti de su pobidhu e sa disispida de su fillu. Balentinu no est sceti unu cani, ma est unu cumpàgiu beru chi dha protegit d’èssiri assola.
…..
…..
…..
Custu lìbburu est unu bobboi, ca tenit medas parris chi si certant e si fuedhant in is bariantis de sa lìngua de a cade una de is bidhas de is personàgius.