Agùrius a totu is sardus disterraus in custu mundu tribbuliau. Assumancu penseus a custas diis de festas de su Kalendàriu. Custu est su Kalendàriu de su "Carrasegare Sardu" bessiu in su 1985/1986. Prus de bintannus a oi.

S’annu passau in s’ùrtima dii de Paschixedha, su 31, in sa telebisura Videolina est bessia s’arrecensidura de su Kalendàriu in s’arrivista "Bintannus apustis"; cudha borta nd’emus prentau deximillas nùmurus in sa mannaria de 40x50 cm. In su Kalendàriu nc’emus postu is caratzas de su carrasegare sardu: su Compodori, sa Filadora, is Bois, is Xrebus , sa Stria, Su Murvoni etc.. Cartzas trabballadas de s’artisanu Carmine Piras, intzaras biviat in Macumere e oi in Aristanis, chi est stètiu su Majorali chi at cumandau sa Sarìillia unus cantus annus a oi. Dh’emus atobiau a sa primu fiera cuncodrada in Nùgoro.

Seus torrendi a cuncodrai mellus su Kalendàriu, totu custus nòminis funti giai stetius giorronnaus e dhus seus agiorronnendi torra. In custu trabbalu nci funti is nòminis de is santus in sardu, is nòminis de is bidhas in sardu, de cantu diis est longa sa festa e chi su santu si fèstada in una dì fissa o chi custa cambiat de annu in annu, cumenti a sa Pasca manna.

Custu trabballu est stètiu cuncodrau de Francu D.F., Niatziu U., Pauledha P., Bruna U. e Pepi T..

Eus averiguau totu is festas a cumentzai de su 1983 e forsis calancuna oi in dì no si festat prus o est stètia bèndia in d-un’àtera dì a is turistas o pigada e fèstada duas bortas: una in crèsia e s’àtera in is pratzas. Eus lassau fintzas is festas bècias de cussas dis.

Custu Kalendàriu tenit 942 arrigas po 22 pàginis e 32.770 lìteras bàtias. Seus boghendi su Kalendàriu nou po su 2007 cun 1243 arrigas 62 pàginis e 43.304 lìteras bàtias e no nci capit prus in sa stibba de 40x50, ma dh’eus a prentai in d-unu poster de 50x50 de mannària, chi at a tenni in sa cara de ainnantis is mesis in Campidanesu e Logudores e adhia totu sa sighia de is festas mesi po mesi e dì po dì.

Su Kalendàriu