Sàbudu passau, su 09 de Friaxu de ocannu, in s’aula manna de su Cunsillu Cumunali de Cuartu est stètiu presentau su lìbburu de Giùliu Solinas sa tradusidura de su trabballu de Danti Alighieri sa ”Vida Noa”. Su lìbburu est stètiu presentau de Lùciu Spiga e su Cunsillu Cumunali de Cuartu adi saludau cun is interventus de su Presidenti de su Cunsillu e de s’Assessori a sa lìngua sarda. Is poisias funti stètias arresadas in lìngua sarda de s’autori etotu, e in itallianu de Sèrgiu Soi, sa boxi chi contada in prosa fudi de Lina Lazzari.

S’aposentu de su Cunsillu Cumunali fudi prenu in totu is postus a setzi fintzas in cuscus de sa tribuna po su pùbrigu. Funti stètias cantada crubas de cantadoris a cust’òmini chi adi dedicau a sa poesia sarda medas àterus trabballus. Candu est stètia arresada sa poisia “Fèminas chi cumprendeis” est stètia aplaudia de coru de totus, sa poisia candu est poisia manna no nc’est tempus chi dha imbecit. Àtera chistioni de importu mannu meda est ca custu trabballu, ca est scritu in Itallianu e torrau a su costau in sa matesi pàgini in Sardu, srebit fintzas a afortiai su lèssigu sardu e de agiudu mannu a chini est torrendi a s’acostiai a su sardu.

Is àturus trabballus in lìngua sarda de custu autori funti:
”Storia de sa cantada sarda campidanesa” e de “Sa cantada de is dìcius”, Editzionis Castello, 1993;
“Pensamentus in rima”, Editzionis Castello, 1995;
“Comenti nascit e crescit sa poesia de Sardigna”, e in su matessi volùminu “Elementus de cumposizioni pètica in lìngua sarda”, Editzionis Castello, 1997;
“Shakespeare in besti sarda-sessanta sonettus”, Artigianarte Editrice, 2000;
“Questione del sardo illustre e difesa del campidanese” Editzinis Press Color, 2001;
“Rimas e maginis”, Editzionis Press Color, 2002; “Scrittus in memoria de Papa Wojtila” e su “Trìtticu Romanu in Campidanesu”, Editzionis Press color, 2005.

Sa “VIDA NÒA”, introdusidura de Munsinniori Antoni Desogus, acabbau de imprtentzai in su mesi de Idas 2007, po contu de sa I.G.E.S. srl Cuartu Sant’Aleni-Castedhu, prètziu 12,00 eurus.