Maria.
Hai de mei, aflita e sconsolada,
ùnicu fillu miu imaculadu, mala
certu est sa giorronnada
chi custa cosa a mimi im’as contadu!
Fiuda, duncas, arrestu e abbandonada
perdendu a bosu, fillu arregaladu!
Cumenti apu a stari, oh afligida,
de niedhu totu cuberta, e adoloriada?

De àtero modu salvari podeis
su mundu sentza morti obrobriosa,
cumenti eigustu chi liari boleis
essendu tanti forti e bregungiosa
pustis chi voluntària idha eligeis.
No dha lieis tanti dolorosa:
portadimi a su mancu in cumpàngia.
e fedi chi morta primu deu sia.

No bia cussas carris istratziari.
de cudhus ostinadus fariseus,
no bia chi si bollant brullari
de bosu cudhus malvadus giudeus,
no mi bollais tanti tribbulari
chi deu bos bia mòrriri cun is reus,
luxi de cussus ogus in mirari
lassadimi cun bosu acumpangiari.

Hai de mei, sconsolada, priva de cunsolu,
sentza cuntentu priva de allirghia,
cun annùgiu, afannu e cun dolu,
cun pura solidadi e agonia!
Portadimi cun bosu, no andeis solu
po chi disìgiu fàiri bos cumpangia!
No morgiais, fillu, cun tantis doloris
ca at a mòrriri unu coru cun duas personis.

Christu.
Imoi eis amostari su valori
e ancu sa prudèntzia e fortalesa
de cudhu ardenti e fervorosu amori
chi in cussa ànima santa a fatu impressa.
Imoi eis amostari su primori
e ancu sa prudèntzia e sabiesa
biendu custu fillu tanti amadu
a morti, sentza curpa, cundennadu.

Im’eis a biri portari straxinendu
a sonu de trumbita, e aciotadu,
cun corona de spinas no endu
fatu errori nisciunu ne pecadu.
Aici in custu modu tratendu,
eis a biri a fillu bostu tantu amadu
e posca in d-unu monti in gruxi mortu,
cussus bos naru mama po aconortu.

Maria.
Oh dolorosa mama ita apu intesu!
Ite totu mi naras fillu amadu!
Beni, su coru miu istat suspesu
ispetendu su tempus destinadu!
Si benis mi pensas èssiri atesu
ma prestu certamente as caminadu
po mi privari de tui vida mia
gàudiu cuntentu miu, e allirghia.

Hai fillu amadu, hai consolu!
Undi bolis andari, fillu istimadu!
Hai cumenti bivu, hai pena e dolu!
Cumenti no mi acabas tristu fadu
po no biri su chi apu de unu solu
fillu chi tanti bonu mi est istadu?
no ti partas, fillu miu amadu e coru,
richesa mia e divinu tesoru.

Hai coru miu totu, hai vida mia!
Nara undi andas fillu e coru amadu?
Undi andas, chi mi privas de allirghia?
Fintzas trinta tres annus im’as portadu
no mi abbandonis fillu e vida mia
resta cun mama tua acumpangiadu!
No mi lassis aflita e tribbulada
po chi fideli mama ti seu istada.

Assu mancu ti suplicu chi una cosa
no mi bollas negari, caru fillu
e est chi tanti dura, e afrentosa
morti, chi bos procurada su cuncillu
cun tali trassa e manera penosa,
bos pregu chi idha lasseis, biancu lillu,
e si mòrriri boleis cun dolori
morgiaus totu impari fillu e sennori.

Christu.
Amantissima ma su chi narais
no dhu potzu promìtiri, ni cumpliri;
e po chi sa rexoni intendais:
de sa morti no potzu fuiri.
Biu chi consolari mi disigiais,
perou seu obrigadu a obbidiri
ca su eternu Babbu im’at mandadu
po chi rèstidi su òmini salvadu.

Mallena
Maistu diletu miu e durci isposu,
consolu de custa ànima afligida,
sennori miu e Deus groriosu
poita est tanti prestu sa partida?
No s’agatat po mei
si mi mancais, sustentu mia vida
No s’agatat po mei prus lìbbera vida
si perdu custu amparu e cumpangia.

O regalada e durci meixina
de is feridas mias tanti mortalis
àcua luxenti crara e cristallina
de durcis abbundantis manacialis,
aflita deu arrestu, e mischina.
Chini im’at a difèndiri in tantis malis?
Cumenti at a istari su castedhu armadu
de Mallena, solu e abbandonadu?

Oh Imunda pecadora, Mallena,
cumenti as a bìviri e as arrestari
si no bis cudha luxi serena?
Su soli si bolit eclissari
si s’arxentada luna, crara e pura,
si s’istedha luxenti de su mari
cun tenebrosas nuis si cuberinti
e cun afannu su coru mi ferinti

Suba de cali conca as a betari,
Mallena, su pretziosu unguentu?
Cali peis imoi as a samunari
cun is làmbigas de durci cuntentu?
Cali peis is pilus ant isciutari
undi restat su coru presu e tentu?
Oh vanus e incàutus ogus mius
de làmbigas in terra fedi arrius.

Maistu miu, sennori e beru amanti,
mìradi chi bos amu tanti forti:
forti promitu istari che diamanti
e cun bosu patiri pena forti;
in dònnia tempus ap’èssiri costanti:
at èssiri po mei diciosa sorti
mòrriri cun bosu, vida mia e luxi,
incravada, sennori, in d-una gruxi.

Cristu.
Su chi ti pregu, Mallena amada,
in custu afannu miu e tribbulia:
e ti lassu a tui recumandada
a s’aflita e dolorosa mama mia.
Mira chi arrestat sola e abbandonada,
ti pregu chi dhi fatzas cumpangia.
Idha recumandu innantis, qui mi parta
a Giuanni, a Perdu, e ancu a Marta.

E giai chi mi amas tanti forti
e imi disìgias fàiri cumpangia,
in is penas e turmentus de sa morti,
acumpàngiadi cun sa dolorosa mama mia
e si dhu tenis po diciosa sorti,
faidi, ti pregu, cussa òpera pia:
in tanti pena, e dolu idha consola
giai chi restas abbandonada, e sola.