Catechesi  in "Limba" tenuta dal nostro cappellano Don Ferdinando Gallu:

6 de lampadas 2008
Biadu Nigolau dae Gesturi

Rosariu Cantadu in Bioglio de Biella a sas noe de su sero

Cherimus ringratziare, frades et sorres, su prideru don Luigi, parrocu de custu logu et vicariu de custa zona pastorale, chi nos retzit in custa bella cheja. Cheja istimada dae sos sardos in terra biellesa, ca tenet sas reliquias de su biadu Nigolau dae Gesturi, Jiuanne Medda.

Cherimus saludare sos parentes de su biadu, chi suni innoghe.

Sos frades de sanctu Franziscu si jamana a numene, su numen chi hant retzidu cando hana fattu sos votos; su sambenadu, gasi l’immentigana, et bi aggiunghene su numen de sa bidda in ue suni naschidos. E gai Jiuanne Medda cando si faghet frade si giamada Nigolau dae Gesturi.

Suni importantes sas raighinas.
Abberu est gai. Sardos semus et cherimus faghere onore a sa terra nostra. Ma sa raighina nostra cale este?

Sa mantessi de tottu sos atteros homines et feminas de su mundu: fattos tottu dae Deus; totu cantos peccadores; tottu cantos, grascias a Deus, saivados in su battijimu, innestados in Jesu Cristu, comente narat Santu Paulu.

Et tando pruite semus differentes, pruite carchi unu est bonu, biadu finzas, et carchi unu no lu este?

Criaduras de su Segnore naschimus in d’una domo, in d’una idda. Sa domo, babbu et mama, frades et sorres, sa idda, sa zente, sa vida de sa domo et de sa idda no suni chena calidades proprias, calidades chi dana unu colore, chi ajiuana a creschere in d’una manera o in d’un’attera.

M’azzis a narrer chi a Gesturi no fini tottu santos. Beru. Apo nadu: ajiuana, no chi faghene creschere. No semus aivures… Semus homines. Podimus semper seberare su bonu o su malu.

Comente narat Jesu Cristu in su Evangeliu de sanctu Jiuanne “Su Fizu faghet su [chi] faghet su Babbu” (5,19s).

Jiuanne Medda creschit in d’una domo cristiana, in ue babbu et mama pregant et insinzana a pregare a sos fizzos, et l’insinzana puru a tribagliare et a bivere onestamente.

Sa soziedade de crasa hada at essere prus zivile, su mundu hada at essere mezus si sos jovanos, sos pizzinnos, sos fizzos hana a iscurtare cunsizzos bonos et a bidere esempios bonos.

Sardos semus: et chei sardos carchi cosa de bonu hamus at jughere finzas nois a custa soziedade, pro chi crescat sana, umanamente et cristianamente.