Archivio articoli e news

< Gabrieli Garcia Màrquez, Venutu Lobina e Juan Rulfo
28.04.2014 08:52 Età: 10 yrs
Categoria: Contus e Paristorias, Questioni di Lingua Sarda
Autore: Cristian Urru - Francu De Fabiis

Unu linguàgiu modernu po su connotu

Is contus, in prosa, ddus tenestus, fiant prontus de annus, in unu cadàsciu, abetendi de bessiri. Comèdias e àteras cosas iscritas po passioni


Unu linguàgiu modernu po su connotu
Tres annus fait, pagu prus, nasciat su libru Contus, unu progetu atriviu finantziau cun sa lei 26/97, presentau de su Cumunu de Donori.

S’idea fiat cussa de pònniri impari, in unu ogetu-libru, duas formas de linguàgiu diferentis, duas maneras espressivas po contai su pròpiu fatu, de manera chi podessit arribbai a su nùmeru prus artu de personas, po fintzas a is giòvunus, is chi no imperant prus sa lìngua sarda.

In su tretu chi si seus postus a fai po ndi pesai su progetu eus arrexonau asuba de su fatu ca una lìngua no dda imparaus sceti in iscola, ma fintzas candu, foras de s’istùdiu, si poneus a fai is cosas chi si praxint de prus. Po nai: lìgiri fumetus. No fiat una grandu scoberta custa, e siguramenti nosu no festus is primus chi poniant impari fueddus in prosa e fumetus, in lìngua sarda.

S’ambitzioni perou fiat un’àtera: imparai a is giòvunus a fai fumetus. Ah! Custa sissi ca fiat cosa manna!
Is contus, in prosa, ddus tenestus, fiant prontus de annus, in unu cadàsciu, abetendi de bessiri. Comèdias e àteras cosas iscritas po passioni, de una persona manna, nàscia sucendi sa lìngua sarda cun su lati. E apustis eus trabballau po s’ambitzioni: unu laboratòriu de fumetu cun diletantis chi imparessint s’arti (ca no est a fai figuras a ìnturu de unu cuadrau e a pònniri is fueddus a is nuis!) e chi, apustis, iant a èssiri istètius capassus de mudai is fueddus a figuras.

Po maistus nci  funt bòfius su scenegiadori Daniele Mocci e su disenniadori Jean Claudio Vinci.
A arrogus e a mùssius nci dd’eus fata. Sa diri de sa presentatzioni de Contus, aici dd’eus postu, in su Monti Granàticu Bèciu de Donori no nci capiat prus genti. A s’acabbada totus is chi fiant ingunis si ndi funt andaus prexaus, cun s’ogetu-libru in manus.

Sa primu parti, a fueddus, est de Silvana Aresu, sa segunda, a fumetus, est de duus piciocus chi ant pigau parti a su laboratòriu fatu in martzu-cabudanni 2011, Stefano Piga e Alessio Lecis.

Stefano, giai po contu suu axeliau po su disènniu a manu lìbera, nd’at bogau a pillu una gràfica umorìstica, chi assimbillat a sa de is manga, e chi arresultat de profetu fintzas cun is fueddus in sardu.

Alessio, chi fortzis no iat mai fatu unu disènniu in vida sua, abarrat prus naïf in su sinnu nieddu ma s’inventat unu mini-contu asuta de su contu mannu de Sa còia, ponendi faci a faci sa traditzioni de s’aràtzia cun sa modernidadi de unu cartoon chi arregordat su certu nodiu de Tom & Jerry.

Custas chi sighint funt is bibliotecas cumunalis innui si podit agatai su libru: Donori, Barrali, Dolianova, Gèsigu, Guamayori, Guasila, Muristeni, Nuràminis, Pramantellu, Samassi, Samatzai, Sèlegas, Serdiana, Serrenti, Senorbì, Sètimu, Solèminis, Siurgus Donigala, Sueddi, Ùssana. In Casteddu, invècias, su libru si podit pigai in sa Biblioteca Provinciali, in sa Biblioteca Provinciali de Scèntzias Sotzialis e in sa Biblioteca Regionali.

(Tàulas pigadas de su libru “Contus” de Silvana Aresu, L.R. 26/97, annu 2011)
Cristian Urru