Usa, in su Cungressu nci funti 237 millionàrius
Tuesday, November 10, 2009Sigundu su Crp, totu su Senau est unu club po arricus, difatis, sa mèdia de is patrimòniu de issus est in s’oru de is 2 millionis de dòllarus. “Conflitto d’interressi?”. No si ndi fuedhat nimancu. Est una dei is arrexonis ca is ameriganus no tenint stima meda po sa “casta”.
Su Senau parit unu club po arricus. In mesu de is bividoris de s’amèriga is millionàrius funti sceti su 1%.
Washinton. A in Cungressu, parlamentu, ameriganu sètzint 237 millionàrius, su 44% de is deputaus e senadoris. Est una percentuali “record”, de spantu, de “casta”, prus ca in Itàllia; in mesu de sa populatzioni, difatis, sa percentuali de is millionàrius est sceti de su 1%. E custa chistioni fortzis spricat ca casi sa mitadi de sa Càmara at, sàbudu 07 Donniasantu, votau contras a s’arriforma de sa sanidadi: s’élite no parit meda sensìbbili a sa tragèdia de is 50 millionis de ameriganus chentza de s’assistèntzia sanidària de su Stadu o assiguratzionis mèdigas privadas, ni a cussa de is 16 millionis de disocupaus e de is 9 millionis asutocupaus.
A fàiri is contus in busciaca a is parlamentàrius est su “Center for responsive policy”, Crp, una truma cìvica de Washinton. De is cràculus, is Cresus de su Cungressu, cudhus cun d-unu patrimòniu de prus de 200 millionis de dòllarus cadeunu, funti cincu: su deputau Darrell Issa, s’ùnigu arrepubriganu, 251 millionis; sa cullega Jane Barman, dimugràtiga 245 millionis; su senadori Herb Khol, dimugràtigu, 214 millionis; su senadori Mark Warner, dimugràtigu, 210 millionis; e su senadori John Kerry, chi est stètiu bintu de su presidenti de intzaras Bush a is iletzionis po sa Domu Arva de su 2004, 209 millionis de dòllarus.
Sigundu su Crp, totu su Senau est unu club po arricus, difatis, sa mèdia de is patrimòniu de issus est in s’oru de is 2 millionis de dòllarus. Sa Càmara est in d-unu tretu prus bàsciu, 622 millia dòllarus de mèdia. Ogus a su Senau, su Guvernu est unu club de pòburus. Sa prus arrica est Mary Shapiro, sa “leader” de sa Sec, cumissioni chi càstiat sa Bussa de Wall Street, 26 millionis de dòllarus, sighia de sa sreghetària de su Stadu Hillary Clinton, 21 millionis de dòllarus, intamis su vissu presindenti Biden est s’ùrtimu agoa, 27 millionis de dòllarus, Biden s’est sèmpiri bantaxau de no èssiri arricu.
Unu càmbiu mannu meda arrespetu a su guvernu Bush, aundi su ministru de sa Defensa Donald Rusmfeld, bincit cun prus de 200 millionis de dòllarus; fut sighiu de su vissu presidenti Cheney e de medas àterus. Su Crp at spricau fintzas is efetus de sa crisi finatziària e ecunòmiga de is Cresus cungressualis. Is chi perdint meda funti stètius: Kerry, 127 millionis de dòllarus; Warner, 28 millionis de dòllarus; su senadori arrepubriganu John McCain, bintu de Obama a is iletzionis presidentzialis de s’annu passau, 10 millionis de dòllarus.
A s’imbressi, si funti arricaus de prus is senadoris chi enta votau po is agiudus stadalis a is bangus mannus, ca funti fintzas atzionistas. Me in cudhus scònchiant tres arrepubriganus: Mitch McConnell, chi at goràngiau 9 millionis de dòllarus; James Infohe chi nd’at goràngiau 3 millionis de dòllarus; e Richard Selby, chi nd’at goràngiau 2 millionis e mesu. “Conflitto d’interressi?”. No si ndi fuedhat nimancu. Est una dei is arrexonis ca is ameriganus no tenint stima meda po sa “casta”.
S’artìgulu originalli est innoi, cracai e brintai po biri
www.corriere.it/esteri/09_novembre_08/parlamento-usa-milionari-caretto_f9f7287e-cc79-11de-b450-00144f02aabc.shtml
Submitting your vote...
