Pigaus sa navi… totus narian: pigaus sa navi
Thursday, February 04, 2010Annus e annus de dìsterru e a s'acabara tòcara a biri sèmpiri sa pròpiu cosa: su Bùginu... E labai ca su Buginu est sèmpiri su pròpiu, sèmpiri issu est: "Is meris allenus" de is Sardus...
Annus e annus de disterru e a s'acabara tòcara a biri sèmipri sa pròpiu cosa: su Buginu... E làbai ca su Bùginu est sèmpiri su pròpiu, sèmipri issu est: "Is meris allenus" de is Sardus...
Calìncunu pòriri fintzas cambiai nòmini, ma chi no est cìxiri est fà buddia: is pulìticus itallianus, s'Alcoa, Portovesme, Otzana, Sarrocu, is centralis nucrearis, sa telebisioni, s'aliga nucreari, is basis mìlitaris allenas, sa basi de Cuirra, is tzèracus de is pàrtidus cuntìnentalis, su meri mìlanesu, Cuntzillus Arregìonallis s'unu prus lingidori de s'atru, nisciunu sardu in su parlamentu europeu, sa lìngua e s'istòria sarda pigara a puntas de pei...
S’Urrei est diaderus spullincu, ca est arribara s'ora de dd'acabai de andai a Roma a preguntai sa limùsina, tocara a pretendi, cùmenti iat fatu Soru po s' I.V.A., su tanti cosa nosta pò nci bogai a foras is fràbricas pudèscias de is multinatzionallis allenas e itallianas, po lìmpiai su logu de is arrastus afèrenaus e de s'àliga industrialli, de is basis militaris e de totu su pudesciori allenu chi no nc'aturat nudda cun sa terra sarda, poita is Sardus depint torrai a éssiri is meris de is Sardus.
Tanti cussas fràbricas funti giai trasferias in atrus logus, no nci bòlliri meda a ddu cumprendi... Totu cussu dinai arregalau a is meris allenus pò no serrai de oi a cras est totu dinai fuliau, mellus a ddu imperai po su benidori e po mantenni is famìllias de is chi ant pérdiu su trabballu e is de i cussus chi su trabballu no dd'agatanta...
Sceti po limpiai sa Sardìnnia de sa merda allena nc'est trabballu po trint'annus...
Po no pigai arremoni de totu su trabballu chi nd’iara a bèssiri de is ofiìzius nous chi oi funti totus a Roma, is postus in sa scola, is trasportus marìtimus, is operadoris linguìstigus, is ofitzius turìstigus, me in servitzius pùbricus, in su cumèrciu cun is mercaus internaztzionallis chentza dèpiri domandai su pirmissu e abetai is trenus e is navis de sa bregùngia chi nci portant sa cosa a Civitavechia a pudesci abetendi a passai sa dogana... poita no nc'est nudda de fàiri, indipendentzia po is Sardus est libbertari, trabballu, prugresu e dinai... totu su dinai chi no nd'arribara de candu eus pèrdiu sa libbertari.
Ma tocara fintzas chi totus is partidixeddus indipendentistas de s'unu o su duus po centu e is de is sardistas, de su duus po centu issus puru, cumprendant ca certendu apitzus is bideas de Bellieni, Lussu o Simon Mossa pò su chini est, de is partidixeddus de oi, su prus mèllus o su prus indipendentista de s'atru no nc'aturant a nisciunu logu... ca est s'indipendentzia s'obbietivu prus mannu, scet’isssu, totu s'atru bèniri apustis, tanti a s'acabara in su "parlamentu" sardu de su benidori e de su disigiu nc'iat èssiri logu po totus.
Duncas teniara arrexoni etotu Antoni Cossu, fintzas a candu is Sardus de Sardìnnia e is de terramanna no si detzìdint a "pigai sa navi" - sa navi de sa responsabbilidari po torrai at artziai sa conca e castiai in faci s’arrealidari e a nci bogai a su Buginu - no nc'ant'arranesci mai a cambiai s'arrest'e nudda...( Red. )
Pigaus sa navi… totus narian: pigaus sa navi.
Pigaus sa navi est sa crai a fuedhu po brintai in s’arrumanzu. Custus fuedhus funt imperaus cumenti a torrada po dexeotu bortas in duas pàginis; sexi bortas scéti in d-una pàgini de trintaduas arrigas.
Is navis a s’acabbada si scuberrit ca funt duas: s’Ocitània e sa Catalùnya. Funt is navis chi ndi torrant a furriai in Sardìnnia is disterraus spratzinaus in totu s’Oropa. Fiat ora! Chini benit de su mari no benit prus, e sceti, po si sdorrobbai. Is disterraus sardus iant tentu làstima meda de sa Sardìnnia e ant pentzau sa manera de dha agiudai a ndi bessiri de is arroris chi dhis fiat cuncodrendi sa crassi pulìtiga, arregionali. Sa matessi crassi pulìtiga chi, agiumai, nci fiat fendi arrui sa Sardìnnia in d-unu spérrumu chene speràntzia peruna.
E issus intzandus narian: pigaus sa navi.
“ Pigaus sa navi… …tres paraulas - pigaus sa navi - a lenu a lenu…
… totus narian: pigaus sa navi.
… no tenian ateru de narrer: pigaus sa navi... E s’ateru risponniat: pigaus sa navi.
... ch’infrechian cuddu: pigaus sa navi. …sa torrada fuit: pigaus sa navi.
... a su postu de «salude» narian: pigaus sa navi; pigaus sa navi? pigaus sa navi!
... a si biri, pigaus sa navi; ... a nos bier cun salude, e, pigaus sa navi.
... Su «pigaus sa navi», in pagas chidas,.. ...narian in Frantza; pigaus sa navi
... pigaus sa navi, ripitian in Olanda… ...e in su Belgiu; pigaus sa navi...
In s’Europa de sos sardos pariat totu una boghe: pigaus sa navi.
Sas paraulas puru naschen e creschen. Naschen chi cheren narrer una cosa, cussa e basta, pustis, in caminu, s’acontzan, altzian, si prenan e si ufran, cambian colore, lean ateru ispizu.
E contat s’intonu, su chi ddas narat, sa boghe russa o sa boghe fine, sa mesu boghe o su bassu o sa contra, sa die e s’ora e su logu e su tempus, si proet o bessit su sole, si frocat o rannnidat, s’ispetzia de onzunu,a manzanu e a sero, sos pentzamentos, su forrogu s’intentzione. Pigaus sa navi. Insandus.”
Su rétulu de s’arrumanzu est una manera de nai chi tenint in Santu Lussurzu sa bidha de Antoni Cossu. Issu etotu si dhu spricat in s’ùrtima pàgini de s’arrumanzu, Mannigos de memoria totunu a “Sustentamentu” de is pentzamentus, is bisionis.
Su personali pulìtigu, totu sa crassi “digerente” de Sardìnnia in custu arrumanzu benit pigada a brullas, antzis benit amostada cun totu sa poboresa cosa sua.
S’Urrei est spullincu.
S'arrogu "Pigaus sa navi" est liau de s'artigulu: Mannigos de Memoria
Submitting your vote...
