Archivio articoli e news

< A-Simon-Mossa-Le-ragioni-dell'Indipendentismo
28.07.2006 01:13 Età: 18 yrs
Categoria: Poesia, Questioni di Lingua Sarda

Torra-a-ghetai

Is poesias funt stètias pigadas de: Terra Disisperada terra: poesias, Scritus apitzus de de sa dipendèntzia, Editzionis natzionalis sardas, Editzionis Jaca Bock, Milanu, 1974. Venutu Lobina, Is Cantzonis, Is poetas mannus de sa lìngua sarda, Editzionis Della Torre, Castedhu 1992. Custas poesias funt stètias bodhias in custus duus lìbburus e pubrigadas po mori de s'amigà ntzia e sensibbilidadi de Antonedhu Sata e de s'editori po is sentidus e s'arti de Venutu Lobina.


Torra a ghetai

 
Torra a ghetai: Biva! Custu sceti
oi m’alligrat su coru.
Paschixedha est benia
e mancu ocannu su chi de tant’annus
seu circhendu debbadas, mancu ocannu
dh’apu agatau.
 
Notis antìgas
de Paschixedha, notis
biancas de nì, niedhas de scoriu,
sétzius totus a ingìriu de su fogu,
cun mama chi fatu fatu
scaringiat sa fentana po scurtai
is tocus de sa Missa de Pudhu
pustis preniat de tassas unu pratu
de ferru smartau
e passada a bufai:
a babbu chi contat contus de bidha sua,
a Luisicu chi contat contus de trincera,
a tiu Bori chi bufada e no narat nudha,
a totu is àturus, e mesu tassa
a mei, su prus pitiu.

E candu s’intendiat su tochitu
a luxi de lantioni oberriaus
unu mòri in sa nì sentz’e tocai
andendu a crésia.
Ita bella sa crésia sa noti,
ita prexu in su coru ch’intendia
ingenugau a peis de s’artari.
(Oh, deu puru seu stau
àngiulu cun is alas de cartoni,
deu puru apu cantau
“Gloria in excelsis Deo”
a ananti de su Nascimentu.)

 
A pustis, a una a una,
si ndi funti studadas is candelas,
s’est sciorta sa nì, e in su ludu,
in su scoriu de arrugas no connotas
mi seu pérdiu.
E da tandu dhu circu e no dh’agatu
mancu a intru de su coru miu e totu
su Bambinedhu de cudhu Nascimentu.